|
| |
عند اللى بيرسموني
عبيط كأنى أعبط
مطلوق زيّ المربّط
خايفين يستتقلوني
لاحسن أطلع ملخبط
بالبدله دملجوني
قميء كأني أقمأ
يا واد يا ابن الشمقمق
بالنظاره عَمُوني
ع الواقف قَعّدوني
لمّا تشوفني ذليل
بَرْدُون يا خال خليل
زي اللي ادن فى مالطه
و اللي اتنشّق بشنطه
لا تفتكرها غلطه
عند اللي بيرسمونى
مزروع فوق المحطه
احمر ازرق ليموني
بالسبحه و بالمنشّه
فى ايد و فى تانى ايد
زي اللي بيلخموني
و البرتقان جديد
يا ساتر من بعيد
يستغربوا الصوفيه
ساعة ما يبصوا فيه
من بِدَع اليوسفيّه
و سماجة حضرتي
لازق فى سُرّتي
ملزوق كأني غيري
أهبل كأني ضدي
مش شاطر ضدهم
أنا اللي عندهم
عند اللي بيرسموني :
أنا المصري افندي
أنا المصري أفا
فى فن الكاريكاتير
الماكر و المكير
صدرني فى دور خطير
و نفخني عشان اطير
بالأفكار اللي عندي
أنا المصري افندي
أنا المصري أفا
لما المظاهرات
بقت المسامرات
و الخمره فى البارات
و دموع النظارات
ع القلب اللى انطفا
نَصَبُوني في الطريق
تمثال ناطق جريء
قال ايه قال فيه بريق
قال فيِه ريحه و ريق
من خِلاَّن الوفا
و لا شِلْت بكتفي باب
و لا هَبّبت الهباب
و لا مُت مع الشباب
و لا كَلت من الكباب
و لا جُعت زي غاندى
كان ياما و ياما كان
الناظر فى الميدان
حارس ع المزلقان
تَحْويلجي للزمان
فى محطه مطرّفه
و ماكانش في قلبي نار
و لا كان فى رقبتي تار
غير شِي فى عيني الشرار
شيش بيش طالق عيار
ع الباشا مصطفى
كانت ايام يا عين
النكله بملمين
و ماكنش الفقر شين
الدنيا بتشتي فين
أنا قاعد فى الدفا
كان فيه مره يا بيه
أنا بأحلم ولاّ ايه
الدنيا بتجري ليه
الطربوش اختفى
العجله من الشيطان
بغبغني اللخبطان
ما بقت أيام رطان
و القطه ع الحيطان
بتنونو باللاوندي
زمّرت و قلت توت
إدُّوني بدل سكوت
أنا في الملوخيه اموت
مع نسوان البيوت
أحب القرطفه
قال ايه دايماً يطوف
و يلف على العطوف
قال ايه باسمع و اشوف
دا اجربّ من الوقوف
طربوشي الاستفندي
قال دا الوفدي السليم
الدستوري الصميم
السعدي المستقيم
و دا مَحضر سين و جيم
و دا موجز فلسفه
و دا مدخل فى الرجال
و لساني صال و جال
و ضربت يمين شمال
أنا أصْلي حال و حال
أنا انتباه صفا
أنا المصري افندي
أنا المصري أفا
أنا المصري أفنّ
|
|
| |
قرار لنظم المعلومات; © 2007-2008
|
|
|