|
| |
اتفرج على الاراجوز
و اتعلم من الاراجوز
يا فالح و قاري كتاب
مش يمكن أخوك قراجوز
**
خرِّيج المدارس فارس
فى ركوب الحمار الجالس
من أول صُباع للخامس
كان واخد عليك ألعاب
اتفرج على ألعابي
أنا أمسك و اسيب أعصابي
و أنا أطْلَع بيوت أصحابي
باللولب و باللبلاب
متشعلق و قازح قزحه
مش نايم و لكن أصحى
الطاسه دي خوذه و قصعه
و أنا بَنّا وأنا ضرّاب
و عشاي الهوا و فطوري
و شبابي شباب أُسطوري
من طولي و طول طرطوري
أنا بضحك بسن و ناب
أنا صابر عشان مستعجل
وأنا كتفي عصاي بتحجل
و أنا عيني اللي فارغه بتحول
و التانيه اتملت أحباب
لك خِلْقَه وليَّ انا خلقه
و أنا سر الوَحَم والخلفه
كان صوتي طاقية الاخفا
للحُرْمَه ورا الأبواب
مع صوتي اللي قال أنا فاضحك
و سناني اللي قالت باضحك
نبّوتي يقول أنا باطحك
ما تحسّس يا قاري كتاب
مش يمكن أخوك قراجوز
|
|
| |
قرار لنظم المعلومات; © 2007-2008
|
|
|