|
| |
الفنّ مَمْلَكَه
يا اهل الله و صَعْلكه
دا السما والأرض
الطول و العرض
الكلّ البعض
بدِقه و لَكْلَكَه
الفنّ مَمْلَكَه
يا اهل الله
يا اهل الله و صَعْلكه
دا سلامي و الاّ حََرْبي
دا كاري و الاّ كربي
النوع فيِه النوعين
و أنا حاجب تحت عين
باتحرّك بصباعين
و اضرب و يصيبني ضربي
و حَيَاتي تَهْلُكه
و الفنّ مَمْلَكَه
يا اهل الله
يا اهل الله و صَعْلكه
لَكِنْ زوّادى كِسْرَه
عُمره ما داقها كِسْرَى
و انا حافي وهي حاف
و شايلها ع الكتاف
نبّوتي زي ناف
و على نبوتي قشره
من دم المعركه
و الفنّ مَمْلَكَه
و الفنّ مَمْلَكَه
يا اهل الله
يا اهل الله و صَعْلكه
لَفّفني ع الحواري
انا من نسل الجواري
و انا من نسل العبيد
و انا فلاّح الجِريد
و صنايعي فى الحديد
و سواد ليلي نهار
و عرق يعني بُكا
و الفنّ مَمْلَكَه
يا اهل الله
يا اهل الله و صَعْلكه
و طلعت ع السرايه
و رفعت فوقها رايه
و في لذة الاهتزاز
و فى هزة الالتزاز
شُفت عيونك قِزاز
و كمثلي كمثلكا
و الفنّ مَمْلَكَه
يا اهل الله
يا اهل الله و صَعْلكه
يا حبايب يا حبايب
أنا حاضر أنا غايب
أنا ضايع
مش حاضيِع
و خشب لكن رضيع
و انا لابس فى الربيع
هلاهيل اكمني دايب
و خيوطي ملَعْبكه
و الفنّ مَمْلَكَه
يا اهل الله
يا اهل الله و صَعْلكه
|
|
| |
قرار لنظم المعلومات; © 2007-2008
|
|
|