| |
يا ابْن عم الحقّ يا إِبن ..
يا مَيّه من تحت تبن ..
**
الأصيله بنت الأصول
قالت ابن عمك صعب و انت سَلِسْ
ابن عمك غلس و انت شربات
و الواسطه بين الفصول
قالت ابن عمك صعب و انت سَلِسْ
و عينى عينك قال بتختلس من شفّتك قُبله
و الشابه اللى اسمها وصول
قالت ابن عمك صعب وانت سَلِسْ
و عايزه تأتنس !
... كلهم بيحبوك
**
سخسخ من الضحك و قول لابن عمك : شُفت
قول لابن عمك :
عنّك ..
يا حق يا اكتع يا اللي ما بتفهمش في الكُفْت
ـ أراجوز يا أراجوز
بدل ما تغنّى و تدردش
و ترص الكلام و تدندش
و بدل ما تفكّر
و بدل ما تفقّر و تدّروش
ليه يا يا ابن عم الحق ما يندقش ؟
و لو حَبَّه
ما يندبش ؟ ..
و لو دبّه
ـ دبيت مِيِتْ ألف دَبَّه
دبيته بالنبوت و بالمرزبّه
لو كان حديد أو صُلب كان ادّشْدِش
لكن ميَّه من تحت تبن !
|
|