|
| |
أنا عندي مسرح واقعي و تقريري
أبطاله بيقولوا على لساني
كلام يحبّوا عادةً يخفوه
ناقد كَتب عني وعن فني
بالترجمه الحرفيه ما معناه
أسفت خالص بلطجان اتفوه
و الناقد التاني رَطَن بالضاد
و السجع طَنْطَن كتِّفوه انفوه
ما تخفش يا ابني لعبة الأضداد
الناقد الرابع و كان رائع
كَتب بحكمه و مَعْلَمه : اشفوه
و الناقد الغير المحبّ الخير
راكب أسنسير الهرم انسفوه
بنوا العماره ونقدهم وظفوه
لو خدتهم ليلتين الى الحاتي
كانوا تخلوا عن ملاحاتي
فاقد دعا لي جَهْرَةً بالفصحى
موجهاً لي قوله المحبوكا
لا فُضَّ فوك فقلت لا فُضَّ فوه
يالا السلامه إرفعوا السلّم
أنا النهارده ناوي أتكلّم
بحس أخنف منّي ميت مرّه
و لاجل أتقن صنعة التهريج
كما نقول و يفعلون برّه
أخدت خا بالحيله و التخريج
خا من حا خام خامن خواجه جريج
و خا من المخبر في فم الخليج
واقف يراقب يافطة الشخاخيري
لا أعتزر لك عن سبب تأخيري
ظبطت لك آخر تمام منخيري
لو حد عاوز يلبس النظارات
يلبسها يا حضرات
العرض يبدأ في تمام النصّ
و إن جيت لكم و عيني متأخره
قد كنت في عربيه متكسره
باتعلّم الخنفان مع الزمجره
و اتلخبط المكياج معاه الصوت
و مسحت بالزنجار من الطنجره
مناخيره خضرا زي برعم موت
أنا جولد ماير منتج الأفلام
يحلى الكلام بالكدب و الفشخره
أنا جولد ماير منتج الأفلام
يحلى الكلام باللوز و بالنَقْوَره
لسه الزمان ما يجبشي تاني لورا
إوعى تصدق قولة الشنفرى
فيه جنس يحبل كل ست شهور
و لا يمكنش الحاضر يحبل
بدل الماضي من المستقبل
يا سيدي الجمهور يادي الجمهور
يحلى الكلام بالإيه ؟ .. عليك النور
أنا جولد ماير منتج الأفلام
أعرض عليك كل حكايات العصور
هو التاريخ كان ليه ؟ سألتش نفسك
هو التاريخ كان ليه و مكانش ليه
و إن كان ماكانش أنا حاقول لك ماكانش
غيرر متعه للقلب الطري و العين
اللي حتتفرج عليه بعدين
انظر الى الإلياده و الإنياده
انظر الى الأوديسه دي الملحمه
البنت بنت البنت رايحه عياده
تهديها عفريت العريس و الحَمَا
دلوقتي نابليون حينزل يحارب
حاوشوشك في مخدع الجواسيس
الناس تموت لما القمر يبقى شارب
عارفك خسيس أنا أصْلي عارفك خسيس
أنا جولد ماير منتج الأفلام
و الفرفشه و الضحك و التخسيس
و قوس قزح مرجيحه الأحلام
في جزيره وسط البحر بين القوسين
تقرا المجله كل الف سنه
الشمس عريانه و متفستنه
دا فن إسمه الفني فانتستيك
حازغزغك خليك
ثابت على كرسيك
حاقلعك حاكسيك
حافرجك ع الرقص في المكسيك
|
|
| |
قرار لنظم المعلومات; © 2007-2008
|
|
|