|
| |
مسحراتى و جيت فى نسمه طريه
منقراتى انادى ع الخُضريه
ما فضلش غير ساعتين على الفجريه
مايل جناحك فى العسل بتسُوق
عربيه شايله الخير و نازله السوق
سَنَتَك مباركه و شهرنا مرزوق
و الدنيا فرحانه بقمرها الباسم
على كوبرى امبابه مواسم مواسم
أنا شيلت فوق العين و فوق الراس
و الضهر شايل الإشوله و الاقفاص
رزق الحبايب ينقسم انصاص
رزق الحبايب بالهنا لم يفاصل
من السما بالخير على الارض واصل
يطعم صغار الطير و يسقى الحواصل
الحمد لله اللطيف الرحيم
و عينى مليانه و قلبى سليم
و الناس كريمه و شهر طيب كريم
أَضحك كم ضحك الامل و التهانى
و اعمل انا الخضرى وانا الفكهانى
و مسحراتى فى الهوا ودكانى
المشي طاب لى و الدق على طبلى
ناس كانوا قبلى قالوا فى الامثال
الرجل تدب مطرح ما تحب
*
و انا صنعتى مسحراتى فى البلد جوال
أنده على العجميه و حلو من حلوان
على الجوافه روايح و العنب ألوان
البرتقان النسيم اليوسف المشمش
لقيت حديد الكبارى من الحنان يرمش
و يطير بسور الجنينه حسى و الكروان
وسَبّحِتْ فى الندى إمبابه و الأكوان
|
|
| |
قرار لنظم المعلومات; © 2007-2008
|
|
|