|
| |
كاوبوي دينامو
سايق غنمه
علَّق يافطه بعرض الريف
خلّي أَمِيرْكَا
تسْتَعْمرِكا
ست شريفه غرضها شريف
يوم ما بترمي عُقب سيجاره
تفتح بيه توريد و تجاره
شُق الحُصَلَه
إكسر بصله
نخ و طاطى تبقى ظريف
كاوبوي دينامو
خليك جنى وَلَد جنيه
شيل من راسك الوطنيه
نظف مخك أَلاّ تطخك
خَلّيه خالي من التخَاريف
كاوبوي دينامو
لها فى اللعب فنون و براعه
فى مشاريع و بنوك و زراعه
تشتل
تشعتل
تفتل
تقتل
ست غنيه عن التعريف
كاوبوي دينامو
إطلع على مراكبها قلافطي
قولها خدي خلجاتي و نفطي
دي المحبوبه
جاتك غيبوبه
مدرسه حره بالمصاريف
كاوبوي دينامو
حط دماغك تحت جناحها
ارضع فى البزازه مِنَحْهَا
بكره تبَيِّتْ
راقد ميّت
كيف الغاوي مع الحريف
كاوبوي دينامو
|
|
| |
قرار لنظم المعلومات; © 2007-2008
|
|
|