|
| |
كلامى فى واحد دكتور
بعت لعيلته تلات اسطر
.. اطيب تحية و اما بعد
انا ابنكم : الدكتور سعد
ورا الستارة اخدت لى دُش
نَشِّفْتْ جسمى بالبشكير
قعدت قعدة فى ركن العش
قررت من بعد التفكير
ما ارجعش تانى للدبان
و اعيش هنا فى ظل سوبر مان
وبلغوا اختى بهانة
سلام مراتى سوبرمانة
على فكرة اسمى بتنطقة سد
مافيش لزوم اتلقى الرد
ـ يا دمك الشهد بيُقْطُر
بعت لعيلته تلات اسطر
***
رديت عليه بالمستعجل
على شريط فنى مسجل
على الاثير صوتى يجلجل
خسارة فيك التربية
شقا الايدين الفلاحة
خسارة شغل الترزية
فى بدلتك يا متقيف
اخدت دُش و متليف
قعدت قعدة بالراحة
عندك شتا والاّ مصيّف
بقى البلاد السفاحة
خدودها زى التفاحة
بقى انت عاوز تكيّف
بقى انت مش قادر تصبر
بعت لعيلته تلات تسطر
***
يا ايها الولد المبعوث
يا خايب الرجا يا متعوس
من حق تغوى بلاد بره
و من بلادك تتبرا
عشان هنا عندنا دبان
و عندنا جبهة و ميدان
و عندنا اشتراكية كمان
خايف لنكشف بالمجان
خايف تناوب فى مبره
على يمين شق التعبان
خايف لتيجى تروح محدوف
وحدك فى وحدة فى نجع شادوف
وسط الكفور المغبرة
ما بينه قنا و ما بين الاقصر
بعت لعيلته تلات اسطر
***
سلام ميوصلكش سلام
من الحمام فى ابراجه
يا غاوى راحة و استجمام
لازم هناك اهل شيكاجو
العصبجية بيحتاجوا
لطب سعد و علاجه
ريّل على عظم دولارهم
الهى تتهنا بنارهم
نينتك هنا يا سعد سعود
ابوك شرحلها افكارهم
وصف لها جنة هليود
حكى لها عن تمييز السود
يا اللى انت ابيض مش مولود
قعدت تقول ربنا يستر
بعت لعيلته تلات اسطر
|
|
| |
قرار لنظم المعلومات; © 2007-2008
|
|
|